Policia dëgjon Ramën/Gjoba për 2606 qytetarë, 13 biznese do paguajnë nga 1 mln lekë dhe heqje e 61 patentave

0 351

Një ditë pasi kryeministri Edi Rama foli për shtim të gjobave, nisur nga situata e pandemisë në vend, duket se Policia e Shtetit ka reaguar menjëherë. 2606 qytetarë janë gjobitur për mosmbajtje të maskës, kurse 13 pronarë lokalesh janë gjobitur me 1 mln lekë për thyerje të rregullave anti-covid. Nga ana tjetër, mësohet se 61 shoferëve u janë pezulluar patentat pasi po lëviznin pas orës 22:00. ”2 administratorë lokalesh janë ndëshkuar me pezullim të aktivitetit për 6 muaj, pasi janë konstatuar në shkelje të përsëritur. 41 prej shoferëve të ndëshkuar u është pezulluar patenta për tre vjet, kurse 52 të tjerë janë ndëshkuar me nga 10.000 lekë”,-informon Policia.

Njoftimi i plotë nga Policia e Shtetit

Intensifikohen kontrollet për zbatimin e masave anticovid. Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren, në të gjithë vendin, për të monitoruar zbatimin e masave për parandalimin e përhapjes së COVID-19. Gjatë mbrëmjes së djeshme, në Tiranë janë ndëshkuar me pezullim të lejes së drejtimit, 61 drejtues mjetesh, të cilët u konstatuan duke lëvizur me mjet pas orës 22:00.

Po në kuadër të monitorimit të zbatimit të masave anticovid, gjatë ditëve të fundit, në të gjithë vendin janë ndëshkuar me masë administrative 3.000 lekë, për mosvendosjen e maskës, 2606 shtetas; 13 administratorë dhe pronarë lokalesh që ushtronin aktivitetin në kundërshtim me protokollet e sigurisë janë ndëshkuar me nga 1.000.000 lekë; 2 administratorë lokalesh me pezullim të aktivitetit për 6 muaj, pasi janë konstatuar në shkelje të përsëritur; 41 drejtues mjetesh janë ndëshkuar me pezullim të lejes së drejtimit për tre vjet,52 shtetas janë ndëshkuar me nga 10.000 lekë, pasi janë konstatuar duke lëvizur pas orës 22:00.

Ndërkohë, Drejtori i Përgjithshëm i Policisë së Shtetit Ardi Veliu, pas apelit dhe thirrjes drejtuar qytetarëve për respektim me rigorozitet të masave kufizuese anticovid, ka dalë sërish në terren për të monitoruar nga afër zbatimin e këtyre masave.

Policia e Shtetit apelon edhe njëherë për të gjithë qytetarët që të zbatojnë me rigorozitet masat anticovid, pronarët dhe administratorët e lokaleve të zbatojnë protokollet e sigurisë, ndërsa drejtuesit e automjeteve të respektojnë orën policore, pasi kontrollet do intensifikohen akoma më tej, në bashkëpunim edhe me Task Forcën, për të bërë të mundur ndërprerjen e zinxhirit të infektimit të qytetarëve me Covid-19.

Leave A Reply

Your email address will not be published.