Presidenti Meta: Dhuna dhe prepotenca e pushtetit, të patolerueshme. Protestoni për të drejtat tuaja
Presidenti i Shqipërisë, Ilir Meta u ka drejtuar një mesazh qytetarëve shqiptarë, ndërsa i fton që të protestojnë për të drejtat e tyre, duke cituar regjisorin Edmond Budina. Duke marrë shkas nga premiera e monodramës satirike “Profeti i Kokoshkave”, e luajtur Edmond Budina mbrëmë në Presidencë, kreu i shtetit thekson se të protestosh me art ka qenë forma që ai ka zgjedhur. ”Të protestosht me art, kjo është forma, që unë kam zgjedhur. Por ju mos harroni: PROTESTA ËSHTË QYTETARI! MOS HARRONI TË PROTESTONI PËR TË DREJTAT TUAJA”,- shkruan më tej Meta.
Mesazhi i plotë
Një mbrëmje artistike e paharruar dje në Presidencë, ku patëm kënaqësinë e veçantë të ndiqnim premierën e monodramës satirike “Profeti i Kokoshkave” të artistit tonë të shquar dhe regjisorit të mirënjohur, Edmond Budina.
Shumë i lumtur që kjo shfaqje e jashtëzakonshme teatrale, e lindur si shenjë proteste kundër shkatërrimit brutal dhe kriminal të Teatrit Kombëtar, mblodhi me dhjetëra artistë, profesorë, diplomatë, politikanë e gazetarë që gjithmonë do t’i kenë dyert e hapura në këtë institucion, kështjellë të pamposhtur të lirisë, të drejtave të njeriut e demokracisë, por edhe të mbrojtjes së artit dhe trashëgimisë kulturore kombëtare.
“Profeti i Kokoshkave” është një shfaqje kundër dhunës në përgjithësi dhe dhunës së pushtetit në veçanti, e frymëzuar nga protesta disa vjeçare dhe kauza mbarëkombëtare për mbrojtjen e Teatrit Kombëtar, e kthyer tashmë edhe në çështje europiane.
Bashkëndaj plotësisht të njëjtin qëndrim me artistin tonë të mirënjohur Edmond Budina se: “Magjia e teatrit, qëndron edhe në atë, që gjithkush gjen shëmbëlltyrën e x-deliranti, pretendent diktatori apo diktatori. Dhuna dhe prepotenca e pushtetit, pavarësisht ngjyrës, mbeten të patolerueshme, sado të përpiqesh t’i veshësh me petkun e ëndërrt të demokracisë.
Të protestosht me art, kjo është forma, që unë kam zgjedhur. Por ju mos harroni: PROTESTA ËSHTË QYTETARI!
MOS HARRONI TË PROTESTONI PËR TË DREJTAT TUAJA!”