Presidenti Meta pret ambasadorin e ri të Spanjës: Shpreh mirënjohjen për mbështetjen e vazhdueshme

Presidenti i Shqipërisë, Ilir Meta, ka pritur sot ambasadorin e ri të Spanjës, Marcos Alonso. Kreu i shtetit ka shprehur mirënjohjen për mbështetjen e vazhdueshme dhe të sinqertë të Spanjës, në procesin e integrimit të Shqipërisë. Po ashtu Meta ka thënë se vlerëson marrëdhëniet e mira politike që ka Shqipëria me Spanjën duke shtuar se Shqipëria i jep rëndësi të veçantë jo vetëm bashkëpunimit politik e ekonomik, por edhe atij kulturor dhe arsimor me Spanjën.

Postimi i plotë

Pata kënaqësinë të pranoja sot Letrat Kredenciale të Ambasadorit të ri të Mbretërisë së Spanjës në Shqipëri, Sh.T.Z. Marcos Alonso Alonso. Vlerësova marrëdhëniet shumë të mira politike dhe theksova se ne e konsiderojmë Spanjën një partner shumë të rëndësishëm europian dhe mesdhetar.

Shpreha mirënjohjen për mbështetjen e vazhdueshme dhe të sinqertë të Spanjës në procesin e integrimit të Shqipërisë në Bashkimin Europian.

Duke vlerësuar pozitivisht rritjen në shkëmbimet tregtare midis dy vendeve tona, inkurajova për një prani më të madhe ekonomike të Spanjës në vendin tonë dhe në rajon. Shqipëria i jep rëndësi të veçantë jo vetëm bashkëpunimit politik e ekonomik, por edhe atij kulturor dhe arsimor me Spanjën.