Deputeti i Partisë Demokratike, Ferdinand Xhaferaj ka reaguar pas mbledhjes së grupit Parlamentar që u zhvillua mbrëmë në selinë blu. Në një reagim në rrjetin social “Facebook”, Xhaferaj shkruan se mbrëmë i ka kërkuar dorëheqjen kreut të PD, Lulzim Bashës.
Ai thotë se refuzoj të pranoj se Basha nuk ka pësuar asnjë humbje dhe se refuzon të pranojë se PD është e ndarë mes Bashës e Berishës.
Ndër të tjera ai shkruan se “PD-së e ka kapacitetin dhe mbi të gjitha përgjegjësinë të prodhojë një lidership të ri që të nisë procesin e vështirë por shpresëdhënës të ringritjes së partisë”.
“Mbrëmë, gjatë mbledhjes së Grupit Parlamentar, kam kërkuar dorëheqjen e Lulzim Bashes nga posti I Kryetarit të Partisë Demokratike. Alternativa që PD paraqet nën lidershipin e tij qartazi nuk është e pëlqyer as nga baza e partisë, as nga votuesit e djathtë, as nga elektorati gri.
Unë refuzoj të pranoj se Lulzim Basha nuk ka humbur asnjë garë. Po njësoj refuzoj të pranoj se PD është e ndarë ndërmjet Bashës dhe Berishës dhe s’ka opsion përtej tyre. Themelet e një opozite të vërtetë, sic e meritojnë demokratë dhe më gjerë, hidhen duke dalë së pari nga kurthi i kultit të individit. Grupi Parlamentar i PD-së e ka kapacitetin dhe mbi të gjitha përgjegjësinë të prodhojë një lidership të ri që të nisë procesin e vështirë por shpresëdhënës të ringritjes së partisë”,-shkruan Xhaferraj.
