Fenomeni i shpopullimit, Presidenti Meta organizon panel me profesorë dhe ekspertë (VIDEO)
Shpopullimi i Shqipërisë është një plagë e thellë, ndaj dhe për të luftuar këtë fenomen, Presidenti i Shqipërisë, Ilir Meta ka organizuar një panel me profesionistë dhe ekspertë. Të dhënat nga institucionet shtetërore flasin kryesisht për largimin e të rinjve e konkretisht për ata që kanë mbaruar një shkollë profesionale apo universitet. Varfëria, papunësia, pasiguria, korrupsioni dhe mungesa e përgjithshme e perspektivave kanë dekurajuar rininë.
Në panel mes ekspertëve ka folur edhe profesor Ilir Gëdeshi nga Qendra e Studimeve Ekonomike dhe Shoqërore. Ai tha se migrimi po merr trajtën e “ikjes së trurit” nga vendi. Nga ana tjetër, Gërdeshi tha se po ikin nga Shqipëria studentët më të mirë dhe më e keqja është se ata nuk duan të kthehen më në masë të madhe. Ai shton se kjo ndodh, për shkak se ata nuk shikojnë përmirësim të gjendjes në vendlindje.
”Nga Shqipëria po ikin edhe të arsimuarit. Emigrimi po merr trajtën e “ikjes së trurit”. Vendet para dhe pas Shqipërisë janë të Afrikës ose të Azisë. Fenomeni sa vjen e po bëhet më shqetësues. Shqipëria ka 18 mijë studentë jashtë. Po ikin fëmijët e elitës intelektuale të vendit. Rreth 94 për qind e studentëve jashtë duan të qëndrojnë në vendin ku studiojnë dhe mos kthehen më. Kjo është diçka e rëndë për vendin. Kjo ndodh, sepse studentët nuk shohin të ardhme apo përmirësim të gjendjes në Shqipëri. Po emigron rinia, që është edhe perspektiva e vendit”, tha Gërdeshi.
Ish-drejtoresha e INSTAT, Ines Nurja, deklaroi se në vitin 2015 ishte kulmi i largimeve të shqiptarëve jashtë vendit. Në këtë video-konferencë ishin të ftuar specialistë dhe personalitete publike. Gjatë fjalës së saj në videokonferencë, Ines Nurja tha se Shqipëria ka lënë pas dhe vendet si Siria apo Iraku, për kërkesat për azil ekonomik në BE. Ajo renditi edhe arsyet se përse largohen shqiptarët.
“Shqipëria është akoma një vend në tranzicion, qoftë nga zhvillimi ekonomik dhe politik. E ndaj lëvizjet demografike janë më të mëdha. Prandaj është bërë kërkesë që të bëhen studime më tepër. Në vitet 90 deri në 2000 arsyet kryesore të emigrimit ka qenë ndryshimi i sistemit. Shqipëria kaloi nga një vend komunist në një vend të hapur, drejt një jete më të mirë. Vitet 200-2010 është parë që arsyet kryesore të emigrimit kanë qenë bashkimet familjare. Në 10-vjeçarin e Fundit për arsye të ndryshimeve pozitive sociale, pritej një ulje e emigracionit, por realisht ndodhi e kundërta. Nëse do kalojmë në çfarë ka ndodhu, jam bazuar në të dhënat e EUROSTAT që tregon lëvizjen e shqiptarëve drejt vendeve të BE. Këto shifra nuk janë vlerësime, por janë njerëz që kanë lëvizur me pasaportë dhe kanë kërkuar azil ekonomik. Po të shohim shifrat vitet 2010-2011 kanë qenë shifra minimaliste dhe më pas janë rritur shifrat e personave që kërkojnë azil ekonomik. Nga 2014 kemi një rritje të numrit, sidomos kulmi arriti në 2015. Kemi 65 mijë persona që kanë kërkuar azil ekonomik.
Pjesa më e madhe që kërkojnë azil janë 25-vjeç deri në 34 vjeç, mosha më e aftë për punë. Të dhënat e tjera shqetësuese janë se ka dhe persona që kanë hyrë në vendet e BE dhe nuk kanë ikur prej andej dhe punojnë ilegalisht, pasi nuk kërkojnë azil ekonomik. Si pasojë e këtyre lëvizjeve të parregullta, shqiptarët kanë nisur të kenë një refuzim që të hyjnë në vendet e BE, po humbasin mundësinë e lëvizjes së lirë. Shqiptarët si pasojë e këtij keqmenaxhimi po i refuzohet e drejta për të lëvizur lirisht drejt vendeve të BE-së.
Shpesh herë thuhet se kjo është gjë normale edhe për shtetet e tjera, por jo kjo nuk është e vërtetë. Shqipëria ndodhet në vendin e parë, ka kaluar dhe Sirinë dhe Irakun, të njerëzve që kërkojnë azil ekonomik. Shqipëria është vendi me numrin më të madh të azilantëve për popullsi”, tha Nurja.
